ఎంఎస్ఎంఈ లకు ఊతమిచ్చేలా సర్కార్ పాలసీ

మానకొండూరు ఎమ్మెల్యే డాక్టర్ కవ్వంపల్లి సత్యనారాయణ సూక్ష్మ, చిన్న, మధ్యతరహా పరిశ్రమల (ఎంఎస్‌ఎంఈ)ను ప్రోత్సహించేలా రాష్ట్ర ప్రభుత్వం తీసుకు వచ్చిన నూతన విధానం ఆ పరిశ్రమల ఆర్థిక పరిపుష్ఠికి ఊతమిచ్చేలా ఉందని మానకొండూర్ శాసనసభ్యుడు డాక్టర్ కవ్వంపల్లి సత్యనారాయణ పేర్కొన్నారు. పారిశ్రామికరంగంలో తెలంగాణ రాష్ట్రాన్ని అగ్రగామిగా నిలబెట్టాలనే లక్ష్యంతో ముఖ్యమంత్రి సీఎం రేవంత్‌రెడ్డి మార్గనిర్దేశంలో, పరిశ్రమల శాఖ మంత్రి దుద్దిళ్ల శ్రీధర్‌బాబు పరిశ్రమల శాఖ ద్వారా నూతన పాలసీని రూపొందించడం, దాన్ని ముఖ్యమంత్రి రేవంత్ రెడ్డి ఆవిష్కరించడం ముదావహమని ఆయన పేర్కొన్నారు. ఈ నూతన పాలసీ ద్వారా సూక్ష్మ, చిన్న, మధ్యతరహా పరిశ్రమలు బలోపేతమవు తుందని, తద్వారా రాష్ట్ర ఆర్థిక వ్యవస్థ మెరుగుపడుతుందని ఆయన అభిప్రాయపడ్డారు. ఇంతకాలం సమస్యలను ఎదుర్కొంటున్న ఎంఎస్ఎంఈలు ఈ పాలసీతో ఆర్థికంగా నిలదొక్కుకోగలుగు తాయని ఆయన పేర్కొన్నారు. ఇప్పటివరకు పారిశ్రామికవాడల్లో ఎంఎస్‌ఎంఈలకు స్థలాలను కేటాయిస్తే, ఔత్సాహిక పారిశ్రామికవేత్తలు ఆయా స్థలాలను గవర్నమెంట్ నుంచి కొనాల్సి వచ్చేదని, ఫలితంగా పెట్టుబడి మొత్తంలో ఎక్కువ డబ్బు స్థలం కొనుగోలుకు ఖర్చు చేయాల్సి వచ్చేదని, దీంతో పరిశ్రమ ఏర్పాటుకు మరింత అప్పులు చేయాల్సి రావడం వారికి భారంగా మారేదని, అయితే ఇప్పుడు నూతన పాలసీతో చిన్నతరహా పరిశ్రమలు స్థాపించాలనుకున్న వారు స్థలాన్ని కొనాల్సిన అవసరం ఉండదని ఎమ్మెల్యే డాక్టర్ కవ్వంపల్లి తెలిపారు. ఏకంగా 33 ఏళ్ల వరకు లీజుకు తీసుకునే వెసులుబాటును ఈ పాలసీ కల్పిస్తుందని, దీంతో పారిశ్రామికవేత్తలపై ఆర్థిక భారం తగ్గుతుందని ఆయన పేర్కొన్నారు. అంతే కాకుండా ఔత్సాహిక పారిశ్రామికవేత్తలు స్థాపించ బోయే పరిశ్రమల కోసం పక్కా భవనాలు కూడా లీజు పద్ధతి లో ఇస్తారని, ఈ భవనాలను కూడా పరిశ్రమలకు అనువు గా ప్రభుత్వ,ప్రైవేటు భాగస్వామ్యంతో నిర్మిస్తారని ఆయన వివరించారు. నిర్ణీత గడువులోగా పరిశ్రమను స్థాపించకుంటే లీజుకిచ్చిన భూమిని, భవనాలను వెనక్కి తీసుకుంటారని ఆయన తెలిపారు. ఈ నూతన విధానం తో రాష్ట్రంలో పారిశ్రామిక ప్రగతి పరుగులు పెడుతుందని ఎమ్మెల్యే డాక్టర్ సత్యనారాయణ పేర్కొన్నారు